Saturday, December 26, 2020

రాశి ఫలాలు - డిస్కౌంట్ సేల్

 అట్లాంటా , ఆమెరికా 

2019 డిసెంబర్ 24 - రాత్రి 11:00

శతాబ్ధం లో ఒక్కసారి ఆకాశం లో జరిగే అద్భుతం - షష్ట గ్రహ కూటమి....

మరి కొన్ని ఘడియల్లో జరగబోతుంది. వృశ్చిక రాశి కి రెండవ స్థానం ధనూ రాశి లో ఆరు గ్రహాల కలయిక... 

అదే సమయం లో చేతిలో మెగా మిలియన్ లాటరీ టికెట్ తో ఆత్రుతగా టివి వైపు చూస్తున్నా.

గురుడు స్వస్థానం ధనూ రాశి లో అడుగు పెడుతూ , అక్కడ ఏడేళ్ల నుండి ఉన్న శని వైపు చూసి చిద్విలాసం గా నవ్వాడు. టివి లో యాంకర్ చెప్పిన మొదటి నంబర్ 18... నా టికెట్ లో ఉంది. 

ఇంతలో బుధుడు కూడా  ధనూ రాశి లో  అడుగు పెట్టాడు. రెండో నంబర్ 27 కూడా మ్యాచ్ అయ్యింది. కాస్తా ఉద్వేగం గా తరువాతి నంబర్ కోసం చూస్తున్నా.

కుజుడూ ధనూ రాశి లో అడుగు పెట్టాడు. మూడొ నంబర్ 36. మళ్ళీ మ్యాచ్. హృదయ వేగం పెరిగిపోతుంది.

చందుడి చల్లని చూపు అలా ధనూ రాశి మీద పడి పడగానే నాలుగో నంబర్ 54. ఎప్పుడు లేని బీపి వచ్చిందా అన్నట్టు వళ్లంతా చెమటలు. 

ఇక చివరి ఒక్క నంబర్ కలిస్తే 251 మిలియన్ డాలర్లు.. నా మెదడు వేగం గా లెక్కల్లు కట్టేస్తుంది. ఒక్కసారి క్యాష్ తీసుకుంటే  200 మిలియన్ డాలర్లు. అన్ని పన్నులు పోను 125 మిలియన్లు. 

ఇంకా చివరి నంబరు చెప్పదు ఏంటి అనుకుంటుండగా, అష్టమ స్టానం  లో నుంది కేతువు వక్ర దృష్టి  తో ఒక నవ్వు నవ్వినట్టనిపించింది.. 

టివి లో బొమ్మ కదలటం లేదు.. ఏమైందా అని రిమోట్ కోసం అటు ఇటు చూస్తున్నా..

ఇంతలొ ఈ డ్రెస్ ఎలా ఉంది అని ఒక వాయిస్.. నంబర్ చెప్పకుండా ఈ అసందర్భపు ప్రశ్న ఏంటి .. అయినా అమెరికా టివి యాంకర్ తెలుగు లో మాట్లాడటం ఏంటి నాన్సెన్స్.. అనుకునే లోపు.. మళ్ళీ అదే ప్రశ్న.. "ఈ డ్రెస్ ఎలా ఉంది చెప్పు. అప్పుడే నిద్ర పోయావా ?" 

అయిపోయింది..అంతా అయిపోయింది.. లాటరీ జాక్పాట్ కల చెదిరిపోయింది.. ఆ వాయిస్ శ్రీమతి ది.. 

నూట పాతిక మిలియన్ డాలర్లు అంటే 900 కోట్లు .. మొత్తం కల పాలైపోయింది..   

లేచి టైం చూశా.. ఇంకా 10 కూడా అవలా.. అంటే లాటరీ ఫలితాలు ఇంకా రాలేదు.. కల నిజం అవుతుందేమో అనుకుంటుండగా.. 

మళ్ళీ శ్రీమతి.. ఈ డ్రెస్ బాగుందా..  

నేను - ఎంతా ?

శ్రీమతి - 90 డాలర్లు

నేను అంతా అనే లోపు.. 

శ్రీమతి - 15 % + 10 % + ఎంప్లాయి డిస్కౌంట్ 35 % ఆఫ్ ఉంది.. 

మళ్ళీ మెదడు లో క్యాలుకులేటర్..  60 % ఆఫ్ అంటే 36 డాలర్లు ..

నేను - మంచి డీల్ ఏ.. 

శ్రీమతి - అందుకే ఇంకా పిల్లలకి కొన్ని డ్రెస్ లు , షూస్ కొంటున్నా, నీకేమన్నా కావాలా..

నేను - నెల ముందే కదా Thanksgiving అప్పుడు ఆ ఆఫర్ , ఈ ఆఫర్ అని  బోలెడు బట్టలు కొన్నావ్, మళ్ళీ అవసరమా.. 

శ్రీమతి - ఇంత మంచి ఆఫర్ మళ్ళీ దొరకదు.. అందుకే..   

ఆఫర్లు, షాపింగ్ విషయం లో శ్రీమతి తో వాదించి గెలవటం కన్నా అమెరికా ప్రెసిడెంట్ గా గెలవటం ఈజీ అని తెలిసి మిన్నకుండి పోయా. 


మళ్ళీ లాటరీ టికెట్ గుర్తుకు వచ్చి ఆలోచనలో కి వెళ్ళిపోయా..

 గత వారం నుండి, యూట్యూబ్ ఓపెన్ చేస్తే చాలు... ప్రతి వీడియో పైనా, షష్ట గ్రహ కూటమి గురించే.. 'వృశ్చిక రాశి వారికి కలగపోయే అదృష్టం ఏంటో తెలిస్తే షాక్ అవుతారు.. ' , 'వృశ్చిక రాశి వారికి రాజయోగం.. ' , 'వృశ్చిక రాశి వారికి డిసెంబర్ 25 నుండి పట్టిందల్లా బంగారమే.. ' ఇలా రక రకాలు గా వూరించే వీడియోలు.. కానీ ఎప్పుడు ఆ వీడియోలు చూడలేదు.. 

కానీ ఈ రోజు సాయంత్రం ఆఫీసు నుండి వస్తూ ఉన్నప్పుడు కార్ ప్లే లొ యూట్యూబ్ ఆటో ప్లే నుండి ఒక వీడియో.. క్లుప్తం గా సారాంశం ఏంటంటే ' ఈ షష్ట గ్రహ కూటమి వల్ల వృశ్చిక రాశి వారికి అన్ని కష్టాలు పోయి, బోలెడు ధన లాభం అనినూ, మరియూ నెలలో తొలగిపోయే ఎలిన నాటి శని వల్లా, శని చివర్లో లాభం చేకూరుస్తాడు, అందుకు ఇదే తగిన సమయం  అని తెలియచేయటం కాకుండ..మీరు వూహించనత ధన లాభం అని సెలవిచ్చారు. ఇంకా ఏదో చెప్పేలోపు వీడియో ఆగిపోయింది.. 

అదృష్టం అన్ నోన్ నంబర్ నుండి కాల్ చేస్తే స్పాం అనుకొని సైలెన్స్ లో పెడుతున్నానేమో ఇన్ని రోజులు అనిపించింది, ఆ వీడియో ని ఎందుకో నమ్మాలి అనిపించింది..  రాశి ఫలాలు అంటే అంత గురి కుదరటానికి మూలం  ఒక సంఘటన మరో పోస్టు లో.. 

మన వుద్యోగం లో అంత డబ్బులు వచ్చే అవకాశం లేదు. లేదా పూర్వీకులు ఏదన్నా గుప్త నిధి తాలూకూ మ్యాప్ ఏదీ వదలి వెళ్లలేదు.. ఇక హటాత్తు గా ఎలా వస్తుంది అని ఆలోచిస్తూ ఉండగా ఎదురుగా పెద్ద హోర్డింగ్ .. మెగా మిలియన్ 255 మిలియన్ జాక్పాట్, పవర్ బాల్ 201 మిలియన్ జాక్పాట్ అని..  ఈ రోజు రాత్రి (అంటే ఇండియా కాలమానం ప్రకారం 25 ఉదయం  షష్ట గ్రహకూటమి జరిగే టైం లో ) లాటరి జాక్పాట్ గ్యారెంటి అని ఫిక్స్ అయిపోయా.. దాని ఫలితమే కల.. 

ఆ ఆలోచన నుండి బయట పడే లోపు శ్రీమతి ఆన్లైన్ షాపింగ్ అయిపోయినట్టుంది.. 

నేను - మొత్తం ఎంత ?

శ్రీమతి - 350 డాలర్లు. 

నా మెదడు యధావిధి గా లెక్కలు - 350 లొ 60 % పోతే 140 డాలర్లు.. పర్లేదూ చిన్న బ్యాండ్ ఏలే అనుకునే లోపు , ఫోన్ లో క్రెడిట్ కార్డు అలెర్ట్ మెసేజి.  ..'Your Credit Card has been used at KOHLS for 350 $...  ' అని 

నేను - అదేంటి డిస్కౌంట్ చూపించట్లేదు, 350 లో 40 % 140 ఏ కదా.. 

శ్రీమతి - డిస్కౌంట్ తరువాతే 350 ..

నేను - అంటే 875 డాలర్ల కి బట్టలా ? ఎన్ని కొన్నావ్ ఏంటి ? 

ఆర్డర్ డీటైల్స్ చూసా.. ఒక డ్రెసు, 4 పిల్లల జీన్స్, 4 పిల్లల నైట్ డ్రెస్ , 1 జత షూస్.. ఈ మాత్రం కే 850 ఆ ?

శ్రీమతి - 350 ఏ, డిస్కౌంట్ వచ్చింది గా.. 

నేను - ఆఫర్లు లేని టైలో కొన్నా కూడా ఇవన్నీ 300 కూడా దాటవు గా. 300 వందలు కుడా విలువ చెయ్యని వాటిని 350 కి అమ్మి సేల్స్ పెంచుకుంటూ లాభం తెచ్చుకున్న స్టోర్ వాడి కి ఆఫర్, మనకు కాదు.. 

 అందుకే ఆఫర్ల పేరు చెప్పి ఇలా అవసరం లేనివి కొనద్దు అని చెప్పాలనుకున్నా. ఇంతలో లాటరి గుర్తు వచ్చి , అంత పెద్ద జాక్పాట్ కొడితే 350 ఓ లెక్కా.. ఇదంతా జుజుబీ అనుకొని సైలెంట్ అయిపోయా.. 

ఇంతలో 11 అవనే అయ్యింది.  ఫోన్ లో మెగా మిలియన్ టికెట్ ని స్కాన్ చేసా..

చాలా టెన్షన్ గా అనిపించింది.. అంత డబ్బులు ఏం చెయ్యాలో.. ఓ  90 మంది ఎమెల్యే లని కొని ఆంధ్రా సిఎం అయిపోదామా.. వద్దులే.. తెలంగాణా అయితే బెటర్.. 

అంతలో  "You Didn't win any.. " అని మెసేజ్.. నమ్మ లేక పోయా..మళ్ళీ చూసా.. సేం.. ఏమీ రాలేదు.. ఇదెలా జరిగింది.. 

 నంబర్స్ చూసా.. ఒక్కటంటే ఒక్క నంబర్ కూడా మ్యాచ్ కాలేదు.. 

రాశి ఫలాలు తప్పటానికి ఆస్కారం లేదే.. మళ్ళీ ఒక్కసారి వీడియో చూద్దాం అని ప్లే చేసా.. ఉదయం వీడియో ఆగినంత వరకు బాగానే వుంది..  ఆ తరువాతే అసలు విషయం ..  " .. అన్ని గ్రహాలూ అనుకూలం గా ఉన్నా, వృశ్చిక రాశి వారికి అష్టమ స్తానం లో ఉన్న కేతువు వక్ర దృష్టి వల్ల అనుకున్నవన్నీ జరగవు.. " 

సరిపోయింది.. 

ఇందులో నీతి ఏంటయ్యా అంటే  

యూట్యూబ్ రాశి ఫలాలు చూసి లాటరి కొన్న మగాడు, ఆఫర్లు చూసి షాపింగు చేసిన ఆడది , లాభపడినట్టు చరిత్ర లో లేదు.. 

సర్సరే అనుకున్నవన్నీ అవుతాయా ఏంటి.. ?  

ఉంటా మరి.. 2021 ఎలా ఉంటుందో యూట్యూబ్ లో  రాశి ఫలాలు వీడియో చూడాలి.. ..

బ్యాక్గ్రౌండ్ లో.. 

శ్రీమతి - ఆష్లే లో ఫర్నిచర్ పైన 50 % ఆఫ్ అంట, చూద్దామా ?  

-------------------------------## సమాప్తం ##-----------------------------